Usaksuronggo Om Olintagu (Versi1)

Waro-waroka........................

Waro insan tadauka, panganuno e Usaksuronggo do sisiyud. Kanupo, pamanauno Usaksuronggo sid waeg tu mongoi moniyudka. Korikotpo sid waeg, moniyudno e Usaksuronggo nga aso ot anu dau dot sada. Ugu diri poma nga mamanau e Usaksuronggo moniud posulokka, tu kakalu ong kaanu dot sada sid sulok. Moniyud-moniyud e Usaksuronggo tigogpo om nokokito yino dot iso karabau.

Pomorosno et karabau, 'O umandak tulungai okupo' ka di karabau. Simbar e Usaksuronggo, 'Nunuka ot pokitulungannu?'. 'Panganupo dot kayu' ka di karabau. 'Kuroyon dot kayu?' ka di Usaksuronggo. 'Pomobog dat turongusku' ka di karabau.

Panganuno e Usaksuronggo dot kayu tokodok om bobogono et turongus dit karabau dot topian.
Kobobogpo e karabau, pomorosno wagu e karabau 'Agayo ot ponorimakasiku sid dikau jadi itino ot itaakku sid dika, posulungo ino longon om tulunu silod kabangku.' ka di karabau.

Posulungono di Usaksuronggo et longon om tulu dau sid kabang dit karabau. Polobusopo di Usaksuronggo et longon om tuluyo nga nosulunganno dot tamas et liou om longonyo. Nokopitongkiadpo di karabau uluno e Usaksuronggo sid walai. Kouli e Usaksuronggo sid walai kokitanai di Olintagu, 'Usaksuronggo siombo kinonuannu dino tamasnu?' ka di Olintagu.

Tuturanaino di Usaksuronggo e Olintagu et kowowoyoon dau. Korongoupo di Olintagu olosono dau et sisiyud di Usaksuronggo om ongoino poniyud uguko et nisorita sid dau. Milopo dit nokokitono e Olintagu dit karabau toningno yino. Pomorosno et karabau uguko e boros sidi Usaksuronggo. Om simbarno e Olintagu uguko et simbar di Usaksuronggo kopongo po dot miboboros. Pogiemno e Olintagu dot kayu tagayo om bobogono e karabau dot tinotos di Olintagu pologod sampai nakaraa et turongus dit karabau. Et etung di Olintagu kadungko kaanu dot kayu tagayo om kobobog tologod dit karabau kaanu yino dot ogugumupo ot tamas.

Kopongopo di Olintagu momobog et karabau, suuono di karabau e Olintagu posuang dit longon om tuluyo sid kabang dit karabau sabagai tanda ponorimakasi sid dau. Polobusopo di Olintagu et longon om tuloyo nga noponu dot tangau songrilit-rilit sid longon om liou dau. Na, ulino e Olintagu sid walai dot okonko tamas om naanuyo nga tangau balaai.


Pangajaran: Amu obuli dot tamaha tu kopupuson taanu amu awasi.