Tuesday, January 27, 2009

Usaksuronggo Om Olintagu (Versi2)

Waro-waroka.....

Waro insan tadauka, pamanauno e Usaksuronggo om e Olintagu id iso pomogunan waguka. Korikot sid pomogunan dirika, eranan nogi e Usaksuronggo om e Olintagu tu ongogagayo ot tanom sinoka.

Pamanaunoka yaalo sino id pomogunan dino nga ogumu nogi ot kowaan om todukon tokito, olaed yaalo mamanau napanatanno dirika. Pagaam napanatanno ingkoyodno yaalo om akanono e lutu daaloka. Kokito di Olintagu iso ot budui dot oligkang nogika, onuo di Olintagu om akanono dau. Aa po lelaed korongowno yaalo dot songkutub-kutub nopo mamanauka. Oguyu nogi it tongo sakot dagan dit tuni dit orongou daalo.

Kopongo po it tuni songkutub-kutub poimbulaipo dot iso ot tulun tagayo, okowusan ot niuw dot kasawatto dau. Kokitopo di Usaksuronggo om e Olintagu panangkusno yaaloka, monotosno yaalo manangkus nga nokosupan e di tulun tagayoka. Jadi natabpaanno e Usaksuronggo om e Olintagu. Katabpaaipo yaalo kinurungno yaalo sid kukurungan. E Usaksuronggo sid kukurungon tiso om e Olintagu sid kukurongan tisopo. Nokopitongkiadno e Usaksuronggo om e Olintaguka.

Korikotpo dit sodoinoka songtangkus-tangkus om songuni-unino et tikuska. Et timpuunpoka madadapo e Olintagu, lelaed maalanno e Olintagu mongorongou pomorosno yino, 'Kadadakow sino oi ikus-ikus ogongngiskow.' Ka dau. Okonko tumingkod it tikus opuod nogi dot monguni. Mogkurasang diri e Olintagu sampai minomorosno, 'Kadadakonow sino oi ikus-ikus, lantaan tikoo suab.' Kano dau dot momoros. Sumagayan nogi et tikus dot mongunika.

Usaksuronggo nopo sid sampaping aso ot boboros, madada yino. Bayapo dit opuodno et tikus monguni pomorosno e Usaksuronggo, 'Oi ikus-ikus tulungai okupo palabus mantad sitid kukurungan diti.' Ka dau. Korongou dit tikus et boros di Usaksuronggo kotingkod et tikus monguni. Pongunipo et tikus warono ot luwang dot lobuson di Usaksuronggo. Kokito di Usaksuronggo dot warono ot lobuson dau, ponorimakasihno sid tikus om labusno yinoka.

Korikotpo dit susuab intangai dit tulun tagayo it kukurunganka nga nakalabusno et tiso, asono. Intangaino id sampapingka nga modop-odop e Olintagu. Onuo dit tulun tagayo e Olintagu om suluwono et tolingo om tunuwaino dit tulun tagayoka. Okonko nokopongolanta e Olintagu dot tikus yino nogi ot nolantaanka.

Pangajaran: Amu obuli mangaraat dot dudupot tu waro masa et dupot nga monulung e daaton.

Sunday, January 25, 2009

Usaksuronggo Om Olintagu (Versi1)

Waro-waroka........................

Waro insan tadauka, panganuno e Usaksuronggo do sisiyud. Kanupo, pamanauno Usaksuronggo sid waeg tu mongoi moniyudka. Korikotpo sid waeg, moniyudno e Usaksuronggo nga aso ot anu dau dot sada. Ugu diri poma nga mamanau e Usaksuronggo moniud posulokka, tu kakalu ong kaanu dot sada sid sulok. Moniyud-moniyud e Usaksuronggo tigogpo om nokokito yino dot iso karabau.

Pomorosno et karabau, 'O umandak tulungai okupo' ka di karabau. Simbar e Usaksuronggo, 'Nunuka ot pokitulungannu?'. 'Panganupo dot kayu' ka di karabau. 'Kuroyon dot kayu?' ka di Usaksuronggo. 'Pomobog dat turongusku' ka di karabau.

Panganuno e Usaksuronggo dot kayu tokodok om bobogono et turongus dit karabau dot topian.
Kobobogpo e karabau, pomorosno wagu e karabau 'Agayo ot ponorimakasiku sid dikau jadi itino ot itaakku sid dika, posulungo ino longon om tulunu silod kabangku.' ka di karabau.

Posulungono di Usaksuronggo et longon om tulu dau sid kabang dit karabau. Polobusopo di Usaksuronggo et longon om tuluyo nga nosulunganno dot tamas et liou om longonyo. Nokopitongkiadpo di karabau uluno e Usaksuronggo sid walai. Kouli e Usaksuronggo sid walai kokitanai di Olintagu, 'Usaksuronggo siombo kinonuannu dino tamasnu?' ka di Olintagu.

Tuturanaino di Usaksuronggo e Olintagu et kowowoyoon dau. Korongoupo di Olintagu olosono dau et sisiyud di Usaksuronggo om ongoino poniyud uguko et nisorita sid dau. Milopo dit nokokitono e Olintagu dit karabau toningno yino. Pomorosno et karabau uguko e boros sidi Usaksuronggo. Om simbarno e Olintagu uguko et simbar di Usaksuronggo kopongo po dot miboboros. Pogiemno e Olintagu dot kayu tagayo om bobogono e karabau dot tinotos di Olintagu pologod sampai nakaraa et turongus dit karabau. Et etung di Olintagu kadungko kaanu dot kayu tagayo om kobobog tologod dit karabau kaanu yino dot ogugumupo ot tamas.

Kopongopo di Olintagu momobog et karabau, suuono di karabau e Olintagu posuang dit longon om tuluyo sid kabang dit karabau sabagai tanda ponorimakasi sid dau. Polobusopo di Olintagu et longon om tuloyo nga noponu dot tangau songrilit-rilit sid longon om liou dau. Na, ulino e Olintagu sid walai dot okonko tamas om naanuyo nga tangau balaai.


Pangajaran: Amu obuli dot tamaha tu kopupuson taanu amu awasi.

Monday, January 19, 2009

YusakSurnggo

Awassi daraai dot mongumpug tokou tangon gulu-gulu. Anaru mari tangon di YusakSuronggo om yolintaggu,